کچھ دن ہوئے کہ شہر تمنا اداس ہے

 کچھ دن ہوئے کہ شہرِ تمنا اُداس ہے

دل کیا اُجڑ گیا ہے کہ دُنیا اداس ہے

گہنا گیا ہے جب سے مِرے گھر کا آفتاب

تاروں کا روپ، چاند کا چہرا اداس ہے

لگتا ہے تتلیوں کے کوئی رنگ لے اُڑا

لگتا ہے جگنوؤں کا اُجالا اداس ہے

کہتے ہیں ایک شخص کی دنیا اُجاڑ کر

نادم ہے، شرمسار ہے، دریا اداس ہے

دو لخت ہو گیا ہے جہانِ تصورات

آدھے میں چہل پہل ہے، آدھا اداس ہے

اب دیکھتا ہے مجھ کو تو کہتا ہے آئینہ

بچہ بچھڑ گیا ہے تو بوڑھا اداس ہے

عاجز کسی بھی حال میں شکوہ روا نہیں

کیا تُو بھرے جہاں میں اکیلا اداس ہے؟

مشتاق عاجز