دو صفر ایک سات
لَو اترنے لگی
خواب کے جسم میں
جسم کی روح میں
لب کو چُھوتی رہی
آیتوں کی لڑی
وِرد کرتی رہی
سانس کی ڈور میں
گرد اُڑتی رہی
دُھند بادل میں وہ
گھومتا ہی رہا
جھومتا ہی رہا
میں جو صفر میں تھی
ایک صفر کے صفر میں جیتی رہی
تیری ہوتی رہی
لب سے کہتی رہی
سن مجھے آج تو
میں خلاؤں کی جانب سفر میں رہی
تو بگولہ کوئی
مجھ کو پڑھتا رہا
وِرد چلتا رہا
جسم سے روح میں
عشق پلتا رہا
اور سلگتا رہا
برف کہسار میں
دودھیا دو بدن
ہو سے ہو تک گگن
میں کہیں بھی نہیں
تُو کہیں بھی نہیں
تو یہ کس نے چراغوں کے پیچھے کھڑے
جگنوؤں سے بھرے
ایک ساتھ آسمانوں کے پھیرے لیے
چُھو کے پوروں سے سجدے سفر میں کیے
تمثیل حفصہ
No comments:
Post a Comment