سُبک رفتار لمحوں کی حدیں ترتیب دیتا ہوں
سحر کے سانس گِنتا ہوں شبیں ترتیب دیتا ہوں
مِرے لوگوں کی فطرت میں یزیدی وصف شامل ہے
وہی مجھ کو مٹاتے ہیں جنہیں ترتیب دیتا ہوں
خزاں نے خشک پتّوں میں صدائیں بانٹ رکھی ہیں
میں ان کی سرسراہٹ سے دُھنیں ترتیب دیتا ہوں
تجھے سوچوں تو پہلو سے سَرک جاتا ہے میرا دل
سو دل پر ہاتھ رکھ کر دھڑکنیں ترتیب دیتا ہوں
میں آبِ زر سے لکھتا ہوں تمہارا نام شعروں میں
سنہرے حرف بُنتا ہوں تمہیں ترتیب دیتا ہوں
سلیم ساگر
No comments:
Post a Comment