رہگزاروں پہ نہ جانا لوگو
رہگزاروں پہ لہو تاباں ہے
جاں نثاروں کا لہو
جاں نثاروں کا لہو پوچھے گا
ہم نے جو شمع فروزاں کی تھی
اس پہ کیوں آج دھواں رقصاں ہے
گھر سے جو تیغ و کفن لے کے چلا
کیوں سرِ کوئے بُتاں رقصاں ہے
رہگزاروں پہ نہ جانا لوگو
رہگزاروں پہ لہو تاباں ہے
شہ سواروں کا لہو
شہ سواروں کا لہو پوچھے گا
قافلہ سوئے حرم تھا جو رواں
کیوں سرِ بزمِ جہاں رقصاں ہے
ہم نے جس خون سے دھرتی کو تراوٹ بخشی
جام بن کر کے وہ کیوں پیشِ مُغاں رقصاں ہے
رہگزاروں پہ نہ جانا لوگو
رہگزاروں پہ لہو تاباں ہے
شیر خواروں کا لہو
شیر خواروں کا لہو پوچھے گا
ہم نے جن غنچوں کو سرخی سونپی
ان پہ کیوں بادِ خزاں رقصاں ہے
ہم تھے جس قوم کی جرأت کے نقیب
اس پہ کیوں آہ و فغاں رقصاں ہے
رہگزاروں پہ نہ جانا لوگو
ورنہ قدموں سے سوالات لپٹ جائیں گے
خوں میں ڈوبے ہوئے حالات لپٹ جائیں گے
رہگزاروں پہ کڑا سناٹا
اور افسردہ نشیں خاموشی
رہگزاروں سے گزرنے والو
یوں تو ہرگز نہ گزرنے دے گی
احمد حاطب صدیقی
No comments:
Post a Comment