تری نگاہ سے ذرے بھی مہر و ماہ بنے

عارفانہ کلام نعتیہ کلام

تِریؐ نگاہ سے ذرے بھی مہر و ماہ بنے

گدائے بے سر و ساماں، جہاں پناہ بنے​

رہِ مدینہ میں ‌قُدسی بھی ہیں جبیں فرسا

یہ آرزو ہے مِری جاں بھی خاکِ راہ بنے​

زمانہ وجد کُناں اب بھی اُنؐ کے طوف میں ہے

جو کوہ و دشت کبھی تیری جلوہ گاہ بنے

​

حضورؐ ہی کے کرم نے مجھے تسلی دی

حضور ہی مِرے غم میں مِری پناہ بنے​

تِرا غریب بھی شایانِ یک نوازش ہو

تِرا فقیر بھی اک روز کج کلاہ بنے​

جہاں جہاں سے وہ گزرے جہاں جہاں ٹھہرے

وہی مقام محبت کی جلوہ گاہ بنے​

کریم! یہ بھی تِری شانِ دلنوازی ہے

کہ ہجر میں مِرے جذبات اشک و آہ بنے​

وہ حسن دے جو تِری طلعتوں کا مظہر ہو

وہ نور دے جو فروغِ دل و نگاہ بنے

حافظ مظہرالدین مظہر