ایسے ہی میری آنکھ کو ازبر نہیں ہوا

 ایسے ہی میری آنکھ کو ازبر نہیں ہوا

اس جیسا دوسرا بھی میسر نہیں ہوا

وہ آدمی کے رُوپ میں آدم سے ماورا 

میں یونہی اس کو دیکھ کے کافر نہیں ہوا

چاہے خفا خفا سا ہوں اپنی ہی ذات سے 

لیکن میں تیری ذات کا مُنکر نہیں ہوا

پھر رات کی مُسافتیں آنکھوں کے روبرو 

کچھ اور رہ گیا ہے جو دن بھر نہیں ہوا؟

شاید مِرے وجود سے اُکتا گیا ہے اب 

اس بار وہ سکون بھی مل کر نہیں ہوا 

کچھ فیصلے بھی خوف کی مُٹھی میں قید تھے 

کچھ شوق کے نصیب میں رہبر نہیں ہوا 

شاید اسے حیات سے اُلفت نہیں رہی 

اس بار وہ مریض بھی جانبر نہیں ہوا 

علی ساحر