بھر بھی سکتے ہیں مرے گھاؤ کبھی

 بھر بھی سکتے ہیں مِرے گھاؤ کبھی

تم محبت سے جو سمجھاؤ کبھی

درد سہہ کر بھی سمجھ آئے نہیں

مجھ کو گزرے وقت کے داؤ کبھی

چھوڑ دی منجدھار میں یہ سوچ کر

پار اُترے گی مِری ناؤ کبھی

بے سبب ہنستے تھے پہروں جس جگہ

مجھ سے ملنے پھر وہاں آؤ کبھی

اُس نے کھویا تلخئ اوقات میں

وہ جو لہجے میں تھا ٹھہراؤ کبھی

ہجر ہے اک جان لیوا مسئلہ

مجھ سے مل کر اس کو سلجھاؤ کبھی

لَوٹ کر چاہت کا رکھ لینا بھرم

گر کسی کو منتظر پاؤ کبھی

سینکڑوں پِھرتے ہیں تم جیسے یہاں

مجھ سا کوئی ایک تو لاؤ کبھی

منزہ سید