ستم تو یہ ہے کہ جن کے لیے اٹھائے عذاب

 ستم تو یہ ہے کہ جن کے لیے اٹھائے عذاب 

اٹھا کے جھولیاں دیتے ہیں بد دُعائے عذاب

ہمارے خواب ہمیشہ ہرے بھرے تھے مگر

ملا نہیں ہے ہمیں کچھ بھی ما سوائے عذاب 

یہ زندگی کی دعا تھی کہ بد دعا تھی کوئی 

برائے عشق گزاری ہے مبتلائے عذاب  

اداسیوں کا سبب عمرِ رائیگاں تو نہیں 

بے چینیوں کا سبب ہے کہ یاد آئے عذاب 

کسی کا دستِ دعا ہم سفر ہے جس کے طفیل 

بھٹک رہے ہیں تعاقب میں سٹپٹائے عذاب

فراق و ہجر میں جینا بھی اِک عذاب ہی تھا

شبِ وصال بھی حیرت ہے پیش آئے عذاب 

مرے نصیب پہ آئے گا رشک سن تو سہی 

مجھے ملے ہیں صداقت بنے بنائے عذاب

سید صداقت علی