عارفانہ کلام حمد نعت منقبت
خیال شہرِ مدینہ سے جوڑتا ہوا میں
کہانی راہِ تقدس پہ موڑتا ہوا میں
ملا ہوں اُس کے سخن کی نئی فصیلوں پر
خود اپنے آپ کو پہروں جھنجھوڑتا ہوا میں
اٹھا تو یا شہِ تسنیم المدد کہہ کر
چلا تو پاؤں کے چھالوں کو پھوڑتا ہوا میں
بہ اذنِ باغِ فدک شام ڈھلنے سے پہلے
رطب ارم کے درختوں سے توڑتا ہوا میں
درِ رسولﷺ پر آیا ہوں چند اشکوں سے
تمام لعل و جواہر کو چھوڑتا ہوا میں
گزر رہا ہوں میں سیّارگانِ عالم سے
غبارِ تربتِ سرکارﷺ اوڑھتا ہوا میں
کہیں تو نعت کے مصرعوں میں دیکھا جائے گا
لہو نحیف جگر سے نچوڑتا ہوا میں
کمیل رضوی
No comments:
Post a Comment