عارفانہ کلام حمد نعت منقبت
جو محمدﷺ کے دوارے کا گدا ہوتا ہے
یوں سمجھیے اسے آقاﷺ نے چُنا ہوتا ہے
آلِ احمدﷺ کے فقیروں پہ اُٹھا مت اُنگلی
ان کا رُتبہ تِری سوچوں سے بڑا ہوتا ہے
ان کو عاموں کی کسوٹی پہ پرکھنے والے
ان کا انداز زمانے سے جُدا ہوتا ہے
تیرے سجدوں سے ورا عشق کا سجدہ واعظ
یہ وہ سجدہ جو تہہِ تیغ ادا ہوتا ہے
میں حسینی ہوں نہ مشکل سے ڈراؤ مجھ کو
علیؑ والوں کو کہاں خوفِ بلا ہوتا ہے
مجھ کو بے یار و مددگار سمجھنے والے
میں اکیلا ہوں کہاں، ساتھ خُدا ہوتا ہے
ہم تو ہر حال میں راضی بہ رضا رہتے ہیں
اور ہوتے، جنہیں قسمت سے گِلہ ہوتا ہے
عین ممکن ہے کہ بخشش کا وسیلہ ٹھہرے
ایک مصرع جو عقیدت میں کہا ہوتا ہے
شعر گوئی کا ہُنر عام ہے لیکن الفی
منقبت لکھتا وہی ہے جو چُنا ہوتا ہے
افتخار حسین الفی
No comments:
Post a Comment