اِنتشارِ گُلشن کو ڈالیاں سمجھتی ہیں
گُل پہ کیا گُزرتی ہے تِتلیاں سمجھتی ہیں
کیوں ہُوا میں دیوانہ کیا کسی کو سمجھاؤں
راز میرے سینے کے بیڑیاں سمجھتی ہیں
لفظ کھو گئے سارے ذہن کے درِیچوں میں
خط میں کیا لکھیں اس کو اُنگلیاں سمجھتی ہیں
انتہائے غم میں بھی آنکھ سے نہیں ٹپکے
آنسوؤں کی مجبوری، سِسکیاں سمجھتی ہیں
اک صبا کے جھونکے نے زُلف رُخ پہ بِکھرا دی
حُسن کی نزاکت کو چُوڑیاں سمجھتی ہیں
خُود کو بُھول کر بھی ہم تم کو یاد کرتے ہیں
تم کہاں یہ سمجھو گے ہِچکیاں سمجھتی ہیں
کب تلک مسعود! آخر دل کو ہم دِلاسہ دیں
لذتِ غمِ ہجراں دُوریاں سمجھتی ہیں
مسعود ظہیر نقوی
No comments:
Post a Comment