عارفانہ کلام حمد نعت منقبت قصیدہ در مدح امیرالمومنین مولیٰ علیؑ
یہ کم نہیں علیؑ کی فضیلت کے واسطے
گھر دے دیا خدا نے ولادت کے واسطے
قرآن پاک نہج بلاغت کے واسطے
آئینہ جیسے رکھا ہو صورت کے واسطے
ہیں اہل خلد بھی جہاں خدمت کے واسطے
ہم خاکسار ہیں وہاں مدحت کے واسطے
روشن ہے مصحف رخ مولائے کائنات
قرآن آ رہا ہے تلاوت کے واسطے
چاندی سخاوتوں کی علیؑ بانٹتے رہے
سونا بچا لیا شب ہجرت کے واسطے
مدح علیؑ سنائیے بچوں کو رات دن
نسخہ بتا رہا ہوں ذہانت کے واسطے
چہرہ علیؑ کا سورۂ رحمان کی قسم
کام آ گیا تعارف قدرت کے واسطے
میثم فراز دار سے اعلان کر گئے
دل چاہیے علیؑ سے محبت کے واسطے
جو پوچھنا ہو مجھ سے نکیرین پوچھ لو
اب آ گئے علیؑ مِری نصرت کے واسطے
مل جائے گا لُٹی ہوئی آنکھوں کو اعتبار
موسیٰؑ چلو نجف کی زیارت کے واسطے
اے بوریہ نشیں! تِرے در کا فقیر ہوں
رضواں اُٹھا نہ لے مجھے جنت کے واسطے
تسنیم و سلسبیل وسیلے ہیں سب تِرے
یہ لوح یہ قلم تِری حُرمت کے واسطے
نیر علیؑ کے نام کی کرنوں سے بھیک مانگ
سُورج کے پاس کیا ہے تِری چھت کے واسطے
عباس رضا نیر
No comments:
Post a Comment