عارفانہ کلام حمد نعت منقبت
ہے پیشِ نظر صدق کے شہکار کا چہرا
اصحابِ پیمبرﷺ کے علم دار کا چہرا
دیتی ہیں گواہی کئی آیاتِ الٰہی
آئینہ ہے صدیق کے کردار کا چہرا
صدیق نے جس طرح انہیں غار میں دیکھا
دیکھا نہ کسی یار نے یوں یار کا چہرا
صدیق کو سرکار کے ہمراہ جو دیکھا
خورشید سا روشن ہوا اک غار کا چہرا
اے صدق و وفا! بہرِ خدا اتنا بتا دے
دیکھا ہے کہیں ایسے طرح دار کا چہرا
اعدائے ابوبکر کو ہنگامِ قیامت
کیا آئے نظر رحمتِ غفار کا چہرا
جو کچھ بھی میسر تھا کیا نذرِ پیمبر
بوبکر نے روشن کیا ایثار کا چہرا
قربت کا یہ اعجاز تھا جب غار سے نکلے
تھا یار کے چہرے کی طرح یار کا چہرا
یہ فیضِ ابوبکر ہے فاضل کہ لحد میں
پہچان گیا میں شہِ ابرار کا چہرا
فاضل میسوری
No comments:
Post a Comment