تری نظر میں ترے ما سوا نہیں ہو گا

 تِری نظر میں تِرے ماسوا نہیں ہو گا

تِرے وجود کا جس دن تجھے یقیں ہو گا

جو گھر سے نکلا تو ہر اک کو منتظر پایا

خیال تھا کہ کوئی جانتا نہیں ہو گا

فریب دیتی ہیں ویرانیاں صدا تو لگا

مکان ہے تو یقیناً کوئی مکیں ہو گا

خبر نہ تھی کہ ہزار آنکھیں ہیں اندھیرے کی

اسے خیال تھا چرچا کہیں نہیں ہو گا

ہرے درختوں کے سائے سے اب لرزتا ہے

وہ خشک پتوں میں بیٹھا ہوا کہیں ہو گا

وہ چھپ گیا ہو کسی خوف سے کہیں ورنہ

ابھی دکھائی دیا تھا یہیں کہیں ہو گا

وقار اور کہیں تو نظر نہیں آتا

اگر وہ گھر میں نہیں ہے تو پھر وہیں ہو گا

وقار واثقی