عجب محبوبیت سی وقت کی فطرت میں ہوتی ہے

 وقت اک محبوب ہے

عجب محبوبیت سی وقت کی فطرت میں ہوتی ہے

کبھی دل کو لُبھاتا ہے

تو پھر اس کی عنایت کا تسلسل کم نہیں ہوتا

مسلسل ابرِ رحمت کی طرح 

دل کی دراڑوں میں بھی رِستا ہے

محبت کی پیاسی سرزمیں سیراب کرتا ہے

اسے شاداب کرتا ہے

کبھی دن کی صباحت بانٹتا، شفافیاں تقسیم کرتا ہے

کبھی کالی رِدائیں اوڑھ کر

شب کے سکُوتِ جاں فزا میں سانس لیتا ہے

کبھی یہ پاس آ کر بیٹھ جاتا ہے

یہ کہتا ہے؛

چلو گزرے زمانے کی محبت یاد کرتے ہیں

کوئی دل کے کواڑوں کو اچانک نیم وا کر کے

ذرا سا مسکراتا ہے

مری بنجر زمینوں پر تراوت آتی جاتی ہے

کثافت دُھلتی جاتی ہے لطافت آتی جاتی ہے

کبھی یہ چلتے چلتے دوڑ کر آگے نکلتا ہے

کہ آؤ اور مجھے چُھو لو

مگر میں نارسائی آشنا

اِس سے ہمیشہ دو قدم پیچھے ہی رہتا ہوں

کبھی باہیں گلے میں ڈال دیتا ہے

بڑی محجوب سی نظروں سے تکتا ہے

تو غم کی سنگلاخی میں دراڑیں ڈال دیتا ہے

کبھی اک شمع روشن کر کے کہتا ہے

لپکتی دوڑتی اس زندگی میں آج تم کِتنے برس کے ہو

اچانک رُوٹھ جاتا ہے

کِسی صُورت نہیں منتا

کوئی منّت، کوئی زاری نہیں سُنتا

اسے اپنا بناؤ بھی تو یہ اپنا نہیں بنتا

کبھی یہ دسترس میں ہی نہیں رہتا

ہوا پر پاؤں رکھتا ہے

خلا میں پھیل جاتا ہے

حدِ امکان سے باہر نکلتا ہے

مکاں سے لا مکاں تک جس قدر وسعت میسر ہے

وہاں تک جھِلملِاتا ہے

میں سرتا پا تحیّر ہوں

مگر اُس کی طِلسمی قید میں خوش ہوں

اسی زِنداں میں رہتا ہوں

اسی میں سانس لیتا ہوں

سلمان باسط