مدحِ شبر کی شام آئی ہے

 عارفانہ کلام حمد نعت منقبت

مدحِ حضرت امام حسنؑ

لازمی آج لب کشائی ہے

مدحِ شبرؐ کی شام آئی ہے

خوش خدا اور رسولؐ بھی ہوں گے

آج زہراؑ جو مسکرائی ہے

کہ سنت رسولﷺ ہے یہ

صلح کی بات جب بھی آئی ہے

نعت گوئی بغیرِ مدحِ حسنؑ

یہ پیمبرﷺ سے بے وفائی ہے

اس کو ہر قوم اپنا کہتی ہے

وہ جو شبرؐ کا چھوٹا بھائی ہے

عمر گزری ہے مدحِ مولاؑ میں

خلد تک اب مری رسائی ہے

وقت جب دین پر کڑا آیا

آلِ عمرانؑ کام آئی ہے

کر نچھاور بنامِ آلِؑ نبیﷺ

جتنی پُونجی ہے اور کمائی ہے

نُورِ ایمان سے دُھلا ہے ذہن

اب مِری سوچ کربلائی ہے

اے نجف ہم سمجھ نہ پائیں گے

شان مولاؐ کی ماورائی ہے

نجف زیدی