کسی تحریر سے مطلب نہ اس تفسیر سے مطلب

 کسی تحریر سے مطلب نہ اِس تفسیر سے مطلب

مجھے ہے کربلا والے فقط شبیرؑ سے مطلب

ہمارے مسئلوں کا حل اگر ممکن نہیں تو پھر

تِرے جلسوں، تِرے دعوؤں، تِری تقریر سے مطلب

کما کر اپنے ہاتھوں سے میں بچوں کو کھلاتا ہوں

نہیں اس واسطے مجھ کو تِری جاگیر سے مطلب

جدا ہونے سے پہلے تم مِری تصویر دے جانا

اگر رشتہ نہیں رکھنا تو پھر تصویر سے مطلب

کسے احساس، بوڑھے باپ کے جذبات کو سمجھے

سبھی کو ہے وراثت میں لکھی تحریر سے مطلب

انہیں سونپا گیا ہے کام خوابوں کو سجانے کا

کہاں ہوتا ہے آنکھوں کو بھلا تعبیر سے مطلب

مجھے دنیا کی ہر شے سے جو بڑھ کر ہے عزیز اکمل

اگر وہ مل نہیں سکتا تو پھر تقدیر سے مطلب؟

اکمل حنیف