فیض کی سن کر سبھی سود و زیاں رہنے دئیے

 فیض کی سُن کر سبھی سُود و زیاں رہنے دئیے  

جب محبت ہو گئی،۔ کارِ جہاں رہنے دئیے 

ایک کُنجِ عافیت کافی تھا، سو اہلِ جنوں  

بس گئے دل میں کسی کے، دو جہاں رہنے دئیے

شاہزادے جنگ میں اک کوہ پر بیٹھے رہے  

اور میداں میں سپاہی بے اماں رہنے دئیے

آ گئے ہم نامۂ اعمال خالی چھوڑ کر 

خود سے پوچھے، خود بتائے، امتحاں رہنے دئیے 

مسجد و مندر کی آرائش پہ دولت لگ گئی

اور دھرتی کے مکیں، بے خانماں رہنے دئیے

جن کے گرتے آنسوؤں میں رُوح کا آہنگ تھا

سوگوارانِ جنوں،۔ گریہ کُناں رہنے دئیے

راستہ گرچہ کٹھن تھا، واپسی ممکن نہ تھی 

نو گرفتارانِ محبت، خوش گُماں رہنے دئیے

واعظوں نے دھو لیے ہاتھوں سے دھبے خُون کے

اور پیشانی پہ سجدوں کے نشاں رہنے دئیے

ساکنانِ شہرِ اُلفت،۔ عشق پر نادم نہ تھے

کعبۂ دل میں بُتوں کے آستاں رہنے دئیے 

چھوڑ کر دُنیا کا غم، آنکھیں بھی، دل بھی، جان بھی 

محوِ ناز و عشوۂ حُسنِ بُتاں رہنے دئیے

حامد عتیق سرور