پوچھتے پھر رہے ہیں علی کون ہے

 عارفانہ کلام حمد نعت منقبت

مکر اور خود نمائی کے اس دور میں 

جب نہ معلوم ہو اجنبی کون ہے 

از حدیثِ نبیﷺ لے کے نامِ علیؑ

جان لو کم نسب آدمی کون ہے

جو خدا کا مُحِب اور محبوب ہے

وہ جو کرار ہے غیر فرار ہے

شان میں جس کے ہے یہ حدیثِ نبیؐ

وہ رَجُل جُز علیؑ ولی کون ہے

شانِ حیدرؑ نمایاں احادیث میں 

ان کے اوصاف قرآن تاریخ میں

ھَل اَتیٰ کُل کفیٰ اِنما لا فتیٰ

اور ولی و وصئ نبیؐ کون ہے

جس کو چاہیں بڑھائیں یہ اہلِ جہاں

جس کو چاہیں گھٹائیں یہ اہلِ جہاں

جتنا چاہے گرانے کی کوشش کریں

خُود بلندی کہے گی علیؑ کون ہے

اِن کے دُشمن کا ان سے تقابل ہی کیا

اُن کے ایماں پہ شک اِن پہ رب کا یقیں

اِن پہ شک بھی ہوا تو خدا کا ہوا

جس کو ہو دعوئے ہمسری کون ہے 

اک نُصیری ہی پر کچھ نہیں منحصر 

اِن کو رب کہہ رہے ہیں بڑے نامور

ہم تو ہیں رافضی اور غالی مگر

تم بتاؤ کہ یہ شافعی کون ہے 

سائے کی کیا ضرورت محمدؐ کو تھی

مثلِ سایہ علیؑ ہر جگہ ساتھ تھے

ذوالعشیرہ سے رِحلت تلک ہر جگہ 

جُز علیؑ شخصیت دوسری کون ہے

خندق و بدر و خیبر حنین و اُحد 

ہر کڑے وقت میں کام آئے علیؑ

بعد مطلب نکلنے کے یہ اُمتی

پُوچھتے پھر رہے ہیں علیؑ کون ہے

میرے مولا خدا مصطفیٰؐ مرتضیٰؑ

تا بہ قائم یہی سلسلہ نُور کا

بندۂ مرتضیٰؑ کو خبر ہی نہیں 

خارجی کون ہے ناصبی کون ہے

شاعر و سوز خواں سبطِ جعفر ہوں میں

میرے مداح ممدوح ہیں ہر جگہ

حشر میں دیکھ کر میری آؤ بھگت

سب کو حیرت تھی یہ آدمی کون ہے

سبط جعفر