عارفانہ کلام حمد نعت منقبت
تجھ ایسا کوئی پیکر اوصافِ حمیدہ
تاریخ کے اوراق میں دیدہ نہ شنیدہ
اسلوبِ الہٰی میں کہے کون تِری نعت
قرآن کی صورت میں لکھے کون قصیدہ
لفظوں کی جگہ پھول ہوں قرطاس کی زینت
سرکارﷺ کی مدحت ہے میاں کار کشیدہ
حسرت ہے تِری دید کی آنکھوں میں جواں تر
اور میں اسی حسرت میں ہوا عمر رسیدہ
الله نے قد اور بھی اونچا کیا میرا
میں ان کی اطاعت میں ہوا جتنا خمیدہ
خوشبو ہے فقط تیرے پسینے ہی سے خوشبو
ہر گل ہے گلستاں کا تِرے دم سے دمیدہ
سرکار نے مجھ کو ہے جمیل ایسا نوازا
نے حال پریشاں ہے نہ دامان دریدہ
صادق جمیل
No comments:
Post a Comment