در پر ترے قیمت پہ ہوں میں لایا ہوا شخص

در پر تِرے قیمت پہ ہوں میں لایا ہُوا شخص

یا مالِ غنیمت میں کوئی آیا ہوا شخص

تہذیبِ غلامی کے اداروں میں ملا ہے

ہر شخص کو اک دوسرا پہنایا ہوا شخص

ہر سر ہے تہِ سایۂ افلاک گراں سر

ہر شخص ہے اک سائے میں اک سایہ ہوا شخص

چھوٹے سے سراپا میں جو سمٹا تھا وہی میں

اب کتنے زمانوں میں ہوں پھیلایا ہوا شخص

لوٹا دے مجھے مجھ کو کہ شاید میں وہی ہوں

خود کو تِری دہلیز پہ بھول آیا ہوا شخص

جو جاں تھا مِری چھن گیا وہ مایۂ جاں بھی

میں کب سے ہوں اک بے سروسرمایہ ہوا شخص

جھگڑیں بھی تو اب قیس کہاں آئے گا رَہ پر

وہ عشق کا گمراہ، وہ بہکایا ہوا شخص

اب حکم ہے، آگے کی طرف آنکھ نہ اٹھے

ساحر نہ بنا دے تمہیں پتھرایا ہوا شخص

میں آپ تِرا سامنا کرتا نہیں یا رب

میں ہوں تِری تخلیق پہ شرمایا ہوا شخص

شاید مِرے اشعار پڑھے جائیں مِرے بعد

میں اپنے زمانے میں نہیں آیا ہوا شخص

کوثرؔ! نئے افکار لیے سامنے آؤں

نکلوں نہ میں اشعار میں دہرایا ہوا شخص

اقبالؔ! سے درویشِ خدا سے ملے ہم بھی

کیا جوہرِ معنی سے تھا پرمایہ ہوا شخص

اقبال کوثر