طول غم سے مختصر غم کی کہانی ہو گئی

طولِ غم سے مختصر غم کی کہانی ہو گئی

جب بھری اک آہ دل کی نوحہ خوانی ہو گئی

ختم دل چسپی تِری اے دار فانی ہو گئی

ہم بھی زندہ تھے کب وہ زندگانی ہو گئی

ہر قدم پر ایک نالہ،۔ ہر قدم پر ایک آہ

زندگی کیا ایک شرحِ سخت جانی ہو گئی

ہجر میں آنکھوں سے جاری ہے برابر سیلِ اشک

بند دو کوزوں میں دریا کی روانی ہو گئی

مۓ کو دنیا آتشِ سیال کہتی ہے نظرؔ

لیکن اپنے جام میں آتے ہی پانی ہو گئی

منشی نوبت رائے 

(منشی نظر لکھنوی)