تجھے ياد کيا نہيں ہے مرے دل کا وہ زمانہ

تجھے ياد کيا نہيں ہے مِرے دل کا وہ زمانہ

وہ ادب گہِ محبت، وہ نگہ کا تازيانہ

يہ بتانِ عصر حاضر کہ بنے ہيں مدرسے ميں

نہ ادائے کافرانہ،۔ نہ تراش آزرانہ

نہيں اس کھلی فضا ميں کوئی گوشۂ فراغت

يہ جہاں عجب جہاں ہے، نہ قفس نہ آشيانہ

رگِ تاک منتظر ہے تِری بارشِ کرم کی

کہ عجم کے میکدوں ميں نہ رہی مے مغانہ

مِرے ہم صفير اسے بھی اثرِ بہار سمجھے

انہيں کيا خبر کہ کيا ہے يہ نوائے عاشقانہ

مِرے خاک و خوں سے تُو نے يہ جہاں کيا ہے پيدا

صلۂ شہيد کيا ہے، تب و تاب جاودانہ

تِری بندہ پروری سے مِرے دن گزر رہے ہيں

نہ گِلہ ہے دوستوں کا، نہ شکايتِ زمانہ

علامہ محمد اقبال

بالِ جبریل