فصیل جاں میں دریچہ لگانے والا ہوں

فصیلِ جاں میں دریچہ لگانے والا ہوں

میں تجھ سے اور تعلق بڑھانے والا ہوں

تِرے لیے مجھے لاہور سے محبت ہے

یہ بات سارے جہاں کو بتانے والا ہوں

سہیلیوں میں سنائے گی تُو غزل میری

گٹار پر میں جسے گنگنانے والا ہوں

کسی نے بالیاں بھیجی ہیں تجھ کو تحفے میں

کسی کو میں بھی تو نیکلس دلانے والا ہوں

نہ جانے کون سی منزل یہ راہِ عشق کی ہے

میں شہر چھوڑ کے جنگل کو جانے والا ہوں

سنا تو ہے کہ دعاؤں سے لوگ مِلتے ہیں

سو، میں دعا کے لیے ہاتھ اٹھانے والا ہوں

کسی کی یاد میں تُو بھی دِئیے جلاتی ہے

چراغ میں بھی ندی میں بہانے والا ہوں

قمرؔ! میں ایک جھلک اسکی دیکھنے کے لیے

کسی مزار پہ چادر چڑھانے والا ہوں

قمر ریاض