یہ جو چڑیوں نے بہت شور مچایا ہوا ہے

یہ جو چڑیوں نے بہت شور مچایا ہوا ہے

ایسا لگتا ہے کہ ملنے کوئی آیا ہوا ہے

میرے گھر میں تِری آوازیں ہیں پھیلی مِری جاں

یہاں میلہ تِری یادوں نے لگایا ہوا ہے

یہ جو تم قصہ محبت کا سناتے ہو مجھے

وہی قصہ ہے کہ جو میرا سنایا ہوا ہے

یہ کبھی ہو نہیں سکتا کہ بھلا دوں تجھ کو

یار میں نے تجھے سینے سے لگایا ہوا ہے

تم بھی چاہو تو مجھے چھوڑ کے جا سکتے ہو

میں نے یہ رنج کئی بار اٹھایا ہوا ہے

میں نہیں ساتھ تو چھائی ہے اداسی تم پر

چہرہ اترا ہوا ہے غم کا ستایا ہوا ہے

کون کہتا ہے مجھے عشق ہوا ہے تجھ سے

یہ تو مجھ پر کسی آسیب کا سایا ہوا ہے

یہ جو آپس میں ہیں یوں جلنے لگے شہر کے لوگ

حاسدوں نے یہاں کہرام مچایا ہوا ہے

کسی صورت بھی خوشی اس کو نہیں مل سکتی

جس نے ہنستے ہوئے لوگوں کو رلایا ہوا ہے

تیرے چہرے کی طرف دیکھ کے خوش ہوتا ہوں

کتنا دلکش تجھے اللہ نے بنایا ہوا ہے

یوں تِری یاد سے لو میں نے لگائی ہوئی ہے

بند آنکھوں میں چراغوں کو چھپایا ہوا ہے

اس قبیلے سے تعلق ہے مِرا یار قمرؔ

جس نے بچھڑے ہوئے لوگوں کو ملایا ہوا ہے

قمر ریاض