فرشِ گل بچھوائیں، رنگ و بو کی ارزانی کریں
آؤ بلقیسانِ دوراں سے سلیمانی کریں
پھر پریشاں ہو کوئی زلفِ سمن بو اور ہم
رات بھر تحقیقِ اسبابِ پریشانی کریں
واعظانِ شہر ہیں سب آدمیت کے مزار
ہم سا رندِ با کرامت کیا کوئی ہو گا، کہ ہم
دن کو درویشی کریں، راتوں کو سلطانی کریں
خلوتِ شب میں جو درپئے ہو زلیخائے بہار
ہم نہیں یوسف، کہ عذرِ پاک دامانی کریں
پھر بہار آئی، اٹھو اے دخترانِ سبز رنگ
کنجِ ریحاں میں سبو لبریز ریحانی کریں
زاہدو! ہٹ جاؤ رستے سے کہ ہم بادہ گسار
کوئی سامانِ نجاتِ نوعِ انسانی کریں
شرطِ اول کشف کی یہ ہے کہ پیرانِ حرم
دیدہ و دل حسنِ نوخیزاں سے نورانی کریں
کیا کہیں کیا ہے ہماری بت پرستی کا جواز
کس طرح تشریحِ کیفیاتِ وجدانی کریں
دفترِ اسرار ہے بزمِ گل اندامانِ شہر
آؤ اس دفتر کی ہم اوراق گردانی کریں
دور میں ساغر ہے، ذہنوں کے دریچوں میں ظفرؔ
آؤ آویزاں چراغِ لعلِ رمانی کریں
سراج الدین ظفر
No comments:
Post a Comment