مقابل آپ کی آنکھوں کے آہو ہو نہیں سکتا

مقابل آپ کی آنکھوں کے آہو ہو نہیں سکتا ​

انہیں کے آگے جادوگر سے جادو ہو نہیں سکتا​

مِری آنکھوں سے کیا نِسبت کہ قطرہ آبِ نیساں کا​

درِ نایاب ہو سکتا ہے،۔۔ آنسو ہو نہیں سکتا​

بنا گو سجدہ گاہِ اہلِ ایماں، طاق کعبے کا​

مگر حاصل مقامِ طاقِ ابرو ہو نہیں سکتا​

گداۓ کوچہ کیا درویشِ صحرا گرد کے آگے​

کوئی کتا کبھی وحشت سے آہو ہو نہیں سکتا​

کمال اے ماہِ کامل! تُو نے گو پیدا کیا، لیکن​

ہلالِ عید ہو سکتا ہے، ابرو ہو نہیں سکتا​

لہو سارے بدن کا کر دیا ہے خشک فرقت نے​

مگر اے آہ! تجھ سے خشک آنسو ہو نہیں سکتا​

کرے کیا استفادہ، اس کو استعداد لازم ہے​

کہ برگِ شاخِ گلبن گل سے خوشبو ہو نہیں سکتا​

نزاکت شاخِ گل میں ہے کہاں اس گل سے ہاتھوں کی​

کوئی گلبرگ بھی تعویذِ بازو ہو نہیں سکتا​

ہے اس آتش کے پرکالے سے فرقت ابکے جاڑے میں​

سوائے داغِ حسرت گرم پہلو ہو نہیں سکتا​

جو ہوا پہلو نشیں تو کر گیا پہلو تہی ہم سے​

جدا پہلو سے دم بھر دردِ پہلو ہو نہیں سکتا​

ہوا جو خودنما اس باغ میں جلدی فنا ہو گا​

قیامِ رنگِ گل تا ہستئ بو ہو نہیں سکتا​

امام بخش ناسخ