قرن اول کی روایت کا نگہدار حسین​

عارفانہ کلام منقبت سلام مرثیہ

قرنِ اول کی روایت کا نگہدار حسین​

بس کہ تھا لختِ دلِ حیدرِ کرارؓ حسینؓ

عرصۂ شام میں سی پارۂ قرآنِ حکیم​

وادیٔ نجد میں اسلام کی للکار حسین​

کوئ انساں کسی انساں کا پرستار نہ ہو​

اس جہاں تاب حقیقت کا علمدار حسین​

ابوسفیان کے پوتے کی جہانبانی میں​

عزتِ خواجۂ گیہاں کا نگہدار حسین​

کرۂ ارض پہ اسلام کی رحمت کا ظہور​

عشق کی راہ میں تاریخ کا معمار حسین​

جان اسلام پہ دینے کی بنا ڈال گیا​

حق کی آواز صداقت کا طرفدار حسین​

واۓ یہ جور جگر گوشۂ زہراؓ کے لئے​

ہاۓ نیزے کی انی پر ہے جگر دار حسین​

ہر زمانے کے مصائب کو ضرورت اس کی​

ہر زمانے کے لئے دعوتِ ایثار حسین​

کربلا اب بھی لہو رنگ چلی آتی ہے​

دورِ حاضر کے یزیدوں سے ہے دو چار حسین​

آغا شورش کاشمیری