افضل المخلوق شاہکار ہے

افضل المخلوق شاہکار ہے

آدمی جو صاحبِ کردار ہے

رمزِ الفت بھول بیٹھے ہیں سبھی

جبکہ ہر کوئی ہی دعوے دار ہے

لوگ پڑھتے ہیں بڑے ہی غور سے

گویا کہ چہرہ نہیں اخبار ہے

سر بچانے کا نہیں کچھ فائدہ

گر میسر ہی نہیں دستار ہے

موت سے تو ہم نبھا لیں گے مگر

زندگی تجھ سے نباہ دشوار ہے

اور کچھ کہنے کی گنجائش نہیں

“فن بتاتا ہے کہ یہ فنکار ہے”

وحشتیں تو پھول پھلتی ہیں خمارؔ

آدمیت آج کل بیمار ہے

خمار دہلوی