کھلی ہے کنج قفس میں مری زباں صیاد

کھلی ہے کنجِ قفس میں مِری زباں صیاد

میں ماجرائے چمن کیا کروں بیاں صیاد

دکھائے گا نہ اگر سیرِ بوستاں صیاد

پھڑک پھڑک کے قفس ہی میں دوں جاں صیاد

جہاں گیا میں گیا لے کے دام واں صیاد

پھرا تلاش میں میری کہاں کہاں صیاد

دکھایا کنجِ قفس مجھ کو آب و دانہ نے

وگرنہ، دام کہاں میں کہاں کہاں صیاد

اجاڑا موسمِ گل ہی میں آشیاں میرا

الٰہی! ٹوٹ پڑے تجھ پہ آسماں صیاد

نہ گل کھلیں گے، نہ چہکائے گا کوئی بلبل

بہار باغ کو ہونے تو دے خزاں صیاد

خبر نہیں کسے کہتے ہیں گل چمن کیسا

قفس کو جانتے ہیں ہم تو آشیاں صیاد

اداس دیکھ کے مجھ کو چمن دکھاتا ہے

کئی برس میں ہوا ہے مزاج داں صیاد

رہے نہ قابلِ پرواز بال و پر میرے

قفس سے اڑ کے میں اب جاؤں گا کہاں صیاد

قفس کو شام سے لٹکا کے فرشِ خواب کے پاس

سنا کِیا مِری تا صبح داستاں صیاد

میں جھانکتا نہیں چاکِ قفس سے گل کو بھی

نہ ہووے تا مِری جانب سے بدگماں صیاد

پروں کو کھول دے ظالم! جو بند کرنا ہے

قفس کو لے کے میں اڑ جاؤں گا کہاں صیاد

قفس پہ رکھنے لگا اب تو ہار پھولوں کے

ہزار شکر، ہوا مجھ پہ مہرباں صیاد

عزیز رکھتا ہے، کرتا ہے خاطریں میری

ملا ہے خوبئ قسمت سے قدرداں صیاد

نکالیو نہ قدم آشیاں سے او بلبل

لگاۓ بیٹھے ہیں پھندے جہاں تہاں صیاد

مرے بیان کو سن سن کے کانپ کانپ اٹھا

غضب یہ ہے کہ سمجھتا نہیں زباں صیاد

الٰہی! دیکھیے کیوں کر نباہ ہوتا ہے

زباں دراز ہوں میں اور بد زباں صیاد

فریبِ دانہ نہ کھاتا میں زینہار اے رندؔ

نہ کرتا دام اگر خاک میں نہاں صیاد

رند لکھنوی