دل عاشق میں قلق حد سے سوا ہوتا ہے

دلِ عاشق میں قلق حد سے سوا ہوتا ہے

ذکرِ محبوب بھی اندوہ فزا ہوتا ہے

بت پندار جو اس میں سے جدا ہوتا ہے

یہی دل رتبے میں کعبہ سے سوا ہوتا ہے

انہیں کانوں سے اناالحق کے سنے ہیں دعوے

آدمی عشق میں کیا جانئے کیا ہوتا ہے

حسن کی چارہ گری کا ہے بڑا شور مگر

دردِ الفت کہیں محتاجِ دوا ہوتا ہے

غیر کو غیر جو کہیۓ تو غلط ثابت ہو

اور کہیۓ، کہ وہی ہے تو خفا ہوتا ہے

سوئے منصور اناالحق کی غلط نسبت تھی

کوئی کہہ دے کہیں بندہ بھی خدا ہوتا ہے

دل جو تھا خاص گھر اس کا نہ بنایا افسوس

مسجد و دیر بنایا کرو، کیا ہوتا ہے

دل رُبائی تیری ہر بار نرالی نکلی

واہ رے حسن کہ ہر جلوہ نیا ہوتا ہے

عشق کامل ہو تو مرشد نہیں ایسا کوئی

خود وہی قبلہ وہی قبلہ نما ہوتا ہے

امتیازِ من و تو کچھ بھی تو باقی رہتا

بادۂ جلوہ غصب ہوش رُبا ہوتا ہے

دشمنِ زیست جدائی ہے تو ملنا کیا ہے

قطرہ دریا سے جو ملتا ہے فنا ہوتا ہے

غیر سے قطع نظر چاہیۓ عاشق کے لئے

حاصلِ خلوت و بزم ایک مزا ہوتا ہے

محو و اثبات کے جھگڑے میں پھنسا کر ہم کو

دیکھیں کب لطف ترا عقدہ کشا ہوتا ہے

بے حجابی تھی پسند انکو ابھی کل کی ہے بات

آج پردے میں ہیں پھر دیکھیۓ کیا ہوتا ہے

جس میں دیدار ہو وہ بھی ہے قیامت کوئی

یہ قیامت ہے کہ وہ مجھ سے جدا ہوتا ہے

ابھی دیکھا نہیں اس پر تو یہ بے تابی ہے

دیکھیۓ دیکھ کے کیا حال مرا ہوتا ہے

پھر گئے خلد کو آدم مگر ابلیس تو جائے

نہ بُرا سوچ کسی کا کہ بُرا ہوتا ہے

ہمت شیخ کی صیقل کی بدولت آسیؔ

یہی دل آئینہ روئے خدا ہوتا ہے

آسی غازی پوری