ہاں یہ مانا کہ جو نکلے بھی تو مر کر نکلے

ہاں یہ مانا کہ، جو نکلے بھی تو مر کر نکلے

پر یہ حیرت ہے کہ اس کو چہ سے کیونکر نکلے

شمع کی طرح ہجوم آج ہے پروانوں کا

کیا وہ رکھے ہوۓ سر پہ کلۂ زر نکلے

دیکھ کر حسنِ بتاں منہ سے نکلتا درود

پھول بن کر میری نظروں میں یہ پتھر نکلے

وہ چلے چال کہ پامال ہے سارا عالم

جان تم بھی صفتِ چرخِ ستم گر نکلے

کوۓ قاتل سے کروں میں سفرِ ملک عدم

کوئی رستا جو بسانِ دمِ خنجر نکلے

ہیں وہ مے نوش کہ لالے کی طرح خاک سے بھی

ہم چڑھائے ہوئے جامِ مۓ احمر نکلے

کون یوسف کی طرح باغ میں بکنے آیا

کہ گل و غنچہ لئے مٹھیوں میں زر نکلے

دیکھ کر جنگِ سخن مصرع پُر آب مرے

مثلِ ابروۓ صنم باندھ کہ خنجر نکلے

پھر یہ بخت ہی کہلاؤں سویدا کی طرح

دلِ روشن میں بھی بالفرض اگر گھر نکلے

ترکِ چشمان صنم لڑے آپس ہی میں

دونوں جانب سے بھوئیں کہتی ہیں خنجر نکلے

کوچۂ خاکِ دل خستہ دلاں کیا کہنا

الٹو جس ذرہ کو اس کوچے میں دلبر نکلے

کیوں نہ مٹ جاؤں میں اے دل کہ وہ فرماتے ہیں

آؤں گھر میں تیرے میں غیر جو باہر نکلے

آنسوؤں میں کہاں عکس فگن حسن ترا

دل کے ٹکڑے مری آنکھوں سے مکرر نکلے

نیک سمجھا ہے کچھ افشائے سیہ کارئ عشق

دیکھنا دودِ جگر منہ سے نہ باہر نکلے

وہ نسیمِ نفس صبح سے کمہلاتے ہیں

کیوں یہ آہِ شبِ غم صورتِ صرصر نکلے

دل ہی دل کھو بیٹھے جو سینے سے لگایا ان کو

دل جنہیں سمجھے ہم افسوس وہ دلبر نکلے

حسرتِ کوچۂ محبوب میں کی باغ کی سیر

خار و گل دونوں نگاہوں میں برابر نکلے

یوں بتانے کیلئے عرش سے بھی دور رہتا

تو سہی یار کہ پہلو میں ترا گھر نکلے

سب یہ جانیں کہ غزل آسیِؔ مے نوش کی ہے

شعر جو نکلے وہ دامن کی طرح تر نکلے

آسی غازی پوری