دشت میں ہے ایک نقش رہگزر سب سے الگ

دشت میں ہے ایک نقشِ رہگزر سب سے الگ

ہم میں ہے شاید کوئی محوِ سفر سب سے الگ

شہرِ کثرت میں عجب اک روزنِ خلوت کھلا

اس نے جو دیکھا مجھے اک لمحہ بھر سب سے الگ

ان گنت جلووں سے ہیں کون و مکاں روشن مگر

دل کے خاکستر سے اڑتا ہے شرر سب سے الگ

سب کی اپنی منزلیں تھیں سب کے اپنے راستے

ایک آوارہ پھرے ہم، در بدر سب سے الگ

چلتے چلتے وہ بھی آخر بھیڑ میں گُم ہو گیا

وہ جو ہر صورت میں آتا تھا نظر سب سے الگ

بند ہیں گلیوں میں گلیاں، ہیں گھروں سے گھر جدا

ہے کوئی اس شہر میں شہرِ دگر سب سے الگ

ہے رہ و رسمِ زمانہ پردۂ بے گانگی

درمیاں رہتا ہوں میں سب کے مگر سب سے الگ

سرمد صہبائی