بھولی بسری ایک کہانی رہ جاتی ہے

بھولی بِسری ایک کہانی رہ جاتی ہے

کہاں لڑکپن کہاں جوانی رہ جاتی ہے

دن چڑھتے ہی سارے قصے دھل جاتے ہیں 

کہیں کہیں اک بات پرانی رہ جاتی ہے

ساری دنیا کو تو اپنا کر لیتے ہیں 

اپنی ذات بے گانی رہ جاتی ہے

دن کو تو کاروبار جہاں میں کٹ جاتا ہے 

ساتھ اکیلے رات نبھانی رہ جاتی ہے

ایک ہی پل میں سارا منظر کھو جاتا ہے 

باقی عمروں کی حیرانی رہ جاتی ہے

جب جینے کی ساری مشکل ٹل جاتی ہے

مر جانے کی اک آسانی رہ جاتی ہے

اکثر انجانے لوگوں کے ساتھ سفر میں 

شکل کوئی جانی پہچانی رہ جاتی ہے

کب آتی ہے دل کی بات زباں پر سرمدؔ 

تیری میری شوخ بیانی رہ جاتی ہے

سرمد صہبائی