نہیں کچھ ملال اس کا کہ بدل گیا زمانہ

نہیں کچھ ملال اس کا کہ بدل گیا زمانا

مِری زندگی کے مالک کہیں تم بدل نہ جانا

کبھی لطف سے جلایا کبھی بے رخی سے مارا

کبھی زندگی حقیقت، کبھی زندگی فسانا

تِری کس ادا پہ اپنے دل و جان صدقے کر دوں

نہ کرم کی کچھ نہایت، نہ ستم کا کچھ ٹھکانا

کبھی بدگماں وہ مجھ سے، کبھی بدگماں میں دل سے

ہونہی ہو گیا مکمل، غمِ عشق کا فسانا

کوئی کس طرح چھپائے، غمِ آرزو کو ساحرؔ

جہاں بات منہ سے نکلی، وہیں لے اڑا زمانا

ساحر بھوپالی