دیکھ سکتے نہیں اس بزم میں اغیار مجھے

دیکھ سکتے نہیں اس بزم میں اغیار مجھے 

لے چلی ہائے کہاں حسرتِ دیدار مجھے

ایسی باتوں سے تو بہتر ہے خموشی واعظ 

کہ تِری ضد نے کیا اور گنہ گار مجھے

رحم آتا ہے دلِ زار! تِری حالت پر 

کاش ہو جائے تِری جان کا آزار مجھے

اپنے قاتل سے نہیں خون کا دعویٰ مجھ کو 

بلکہ خود جرمِِ محبت پہ ہے اقرار مجھے

ہو گئی کثرتِ اصیاں سے مِری وہ نوبت 

ہے یہ احسان ملا لیں جو گنہ گار مجھے

مانگتا ہے مِرے جینے کی دعائیں ظالم 

جان کر جی سے خفا، جان سے بیزار مجھے

بوئے ہیں تیری محبت نے ہزاروں کانٹے 

دل ملا ہے کہ ملا وادئ پُر خار مجھے

ہمنشین تجھ سے وہ ہیں، خاک کہوں خلوت میں

آج جو اس نے کہا ہے سرِ بازار مجھے

دل مِرا لے کے وہ پچھتائے ہیں دل میں اے داؔغ

نظر آتی ہے پھری چشمِ خریدار مجھے

داغ دہلوی