تو نے جس شہر تماشا سے گزارا ہے مجھے

تُو نے جس شہرِ تماشا سے گزارا ہے مجھے 

اس نے ہر بامِ تمسخر سے پکارا ہے مجھے

اب میں چاہوں بھی تو دنیا سے نہیں مل سکتا 

زندگی تُو نے بہت دور اتارا ہے مجھے

منفعت کون سی نفرت سے تمہیں ملتی ہے 

گر محبت میں خسارا ہی خسارا ہے مجھے

گر نہیں ہیں تِرے مہر و مہ و انجم میرے 

اک چراغِ تہِ داماں ہی ستارا ہے مجھے

کیا جنوں میں بھی کوئی پاؤں غلط پڑتا ہے  

دل نے کیوں عشق کی مسند سے اتارا ہے مجھے 

میرے بارے تو کوئی اور بتائے گا مجھے 

تم محبت ہو مِری، دھیان تمہارا ہے مجھے

واجد امیر