نوٹس بورڈ پر
مِرے لوگو
خموشی زہر ہوتی ہے
قیاس آرائی کہتی ہے
اگر سقراط کو سچ بولنے کے جرم میں خاموشی دی جاتی
تو وہ بے خوف فرزانہ
پٹخ دیتا زمیں پر کاسۂ سَم کو
مِرے لوگو
زمانہ بولنے والوں کو اکثر مار دیتا ہے
مگر ان کی کہی باتوں سے اپنے آنے والے پَل سجاتا ہے
انہی چمکیلے لمحوں میں یہ مرنے والے جیتے ہیں
نئی تہذیب کے رسیا، انہی کے بادہ خانوں سے
شرابِ جذب پیتے ہیں
مِرے لوگو
تمہارے چار سُو سقراط رہتے ہیں
مگر یہ کیا
کہ بستی پر سکوتِ مرگ طاری ہے
ذرا سوچو
بھلا سقراط بھی خاموش رہتے ہیں؟
مِرے لوگو
فلک کی آنکھ میں چپ چاپ مرتے جاتے لوگوں کا
کوئی خاکہ نہیں بنتا
مگر جو بول کر مرتے ہیں
اپنی بات کہتے ہیں
ہمیشہ یاد رہتے ہیں
احمد حماد
No comments:
Post a Comment