ملتے ہیں اس ادا سے کہ گویا خفا نہیں

ملتے ہیں اس ادا سے کہ گویا خفا نہیں

کیا آپ کی نگاہ سے میں آشنا نہیں

تسکینِ ہم نشیں سے بڑھا درد اور بھی

یعنی غمِ فراق کی کوئی دوا نہیں

شوقِ بقائے درد کی ہیں ساری خاطریں

ورنہ دعا سے اور کوئی بد دعا نہیں

کب تک کسی کے نازِ تغافل اٹھائے دل

کیا امتحانِ صبر کی کچھ انتہا نہیں

محرومیوں نے دل کا یہ کیا حال کر دیا

گویا امیدِ وصل سے ہم آشنا نہیں

ارماں مِرے وصال میں نکلیں تو کس طرح

جوشِ طرب سے دل میں کہیں راستا نہیں

آتا تو ہوں خیال میں ان کے کبھی کبھی

میں موردِ جفا ہوں تو یہ بھی برا نہیں

حسرت موہانی