رنگ اک آتا رہا چہرے پہ اک جاتا رہا

 رنگ اک آتا رہا چہرے پہ اک جاتا رہا

میں تو ماضی کو فقط آئینہ دِکھلاتا رہا

دُھوم تھی جس کے تکلم کی، وہی جانِ سخن

جب حدیثِ دل کی بات آئی تو ہکلاتا رہا

پیاس صحرا کے مقدر میں جو تھی، سو اب بھی ہے

ابر برسا بھی تو، بس دریا کو چھلکاتا رہا

بڑھ کے جو آغوش میں لے لے، کوئی ایسا بھی ہو

جو شجر تھا راہ میں، بس ہاتھ پھیلاتا رہا

رات پھر جلتا رہا تنہائیوں کی دھوپ میں

رات بھر زُلفوں کی چھاؤں کا خیال آتا رہا

خلق پتھر مارنے آئی تو وہ بھی ساتھ تھے

میں خطائیں جن کی اپنے نام لکھواتا رہا

سردار نقوی