سوالی
درِ نبیﷺ پہ کوئی سوالی
قلم کو تھامے ہوئے کھڑا ہوا ہے
یہ سوچتا ہے کہ ایسے الفاظ کون سے ہوں
جو تاجدارِ حرم کے شایان ہونے پائیں
قلم جو مدحِ نبیﷺ کی جرأت کرے تو کیسے
یہ نعت لکھے تو تب ہی لکھے
کہ لفظ بھی اس کے با وضو ہوں
قلم میں جتنے بھی لفظ رہتے ہیں
اپنی نظریں جھکا کے ساکن کھڑے ہیں
جیسےدر نبیﷺ پر نظر اٹھانے کا
بوجھ سہنے نہ پا رہے ہوں
در شہنشاہ کا سوالی
جو خالی ہاتھوں کا ایک کاسہ لیے کھڑا ہے
صدا لگاتا ہے اپنی آنکھوں سے
اس طرح جیسے اس کے سب لفظ کھو گئے ہیں
اسےعنایت ہو بھیک تو یہ کلام لکھے
یہ اپنے آقا کی نعت لکھے، سلام لکھے
عائشہ غازی
No comments:
Post a Comment