سایہ سایہ سحر سحر تنہا
نالشِ نور بے اثر، تنہا
کون ہمراز، کون رہبر تھا
میں ہی تھا اپنا ہمسفر تنہا
ہجرتِ اہلِ ہجر کا منظر
کارواں کارواں بشر تنہا
وارداتِ نظر رقم نہ ہوئی
پارہ پارہ ہوا جگر تنہا
ایک تو صنعتِ نمو کا نظام
اک میرا دستِ بے ہنر تنہا
کیا خبر کب سے راہ تکتی ہے
بام سے اُس کی چشمِ تر تنہا
وہ میری یاد اوڑھ کر آخر
سو گیا ہو گا ہار کر تنہا
میرے بے برگ صبح و شام کا عکس
صحنِ زنداں کا اک شجر تنہا
روز مل کر یونہی بچھڑے رہو
ایسے کٹ جائے گا سفر تنہا
مبارک حیدر
No comments:
Post a Comment