تیرگی میں دِیا جلاتے ہوئے
کوئی گزرا ہے مسکراتے ہوئے
آئینے سے یہ ہی تعلق ہے
دیکھ لیتی ہوں آتے جاتے ہوئے
کیا کروں خُود پہ اختیار نہیں
یاد آتا ہے وہ بُھلاتے ہوئے
سوچ لینا یہ کام اچھی طرح
رابطے اس قدر بڑھاتے ہوئے
بھُول جاتے ہیں دُھوپ کی شدت
لوگ اشجار کو گراتے ہوئے
کاش پہنچوں وفا کی منزل تک
اپنے ہر عہد کو بنھاتے ہوئے
رو پڑا وہ بھی ٹُوٹ کر آخر
تھک گیا جب مجھے ہنساتے ہوئے
ثناء احمد
No comments:
Post a Comment