دہر میں اک ترے سوا کیا ہے

 دہر میں اک تِرے سوا کیا ہے

تُو نہیں ہے تو پھر بھلا کیا ہے

صِلۂ ذوقِ مے کشی معلوم

ظرف کیا شے ہے حوصلہ کیا ہے

حاشیے اپنے، متن ہے ان کا

محتسب! پھر سزا جزا کیا ہے

ان کو ہے دعوٰئ مسیحائی 

جو نہیں جانتے شفا کیا ہے 

لے اڑے گی بلند پروازی 

دوستو! سایۂ ہما کیا ہے 

اتنی افراط، ایسی محرومی 

دینے والے! معاملہ کیا ہے 

سیل شام و سحر میں بہتے ہیں 

کیا خبر زیست کیا قضا کیا ہے 

ہم ہی چپ ہو گئے تمنائی

دے رہا ہے کوئی صدا کیا ہے 

عزیز تمنائی