زندگی ویراں پڑی ہے حادثوں کے شہر میں
روشنی گم سم کھڑی ہے جگنوؤں کے شہر میں
ساری کلیاں رو پڑیں اور پھول مرجھانے لگے
شاخِ غم تنہا کھڑی ہے رونقوں کے شہر میں
ڈھونڈ کر لاؤں کہاں سے میں خوشی کے چار پل
کہ تہی دامن ہوں میں تو حسرتوں کے شہر میں
کون ہے جس کو تمنا چاہے جانے کی نہ ہو
پر انا ٹھہری ہوئی ہے فاصلوں کے شہر میں
کاش ایسا ہو کہ میں رنج و الم کو بانٹ لوں
اور خوشی کے ساز چھیڑوں حسرتوں کے شہر میں
یہ سنا ہے شہر کی گلیوں میں سناٹا ہوا
کیا ہوا سب سو رہے ہیں رتجگوں کے شہر میں
آج بھی میں تو کھڑی ہوں آس کی دہلیز پر
منزلیں کس گام پر ہیں راستوں کے شہر میں
آئرین فرحت
No comments:
Post a Comment