جو حقیقت میں نہیں ہوتا گماں ہوتا ہے

 جو حقیقت میں نہیں ہوتا، گماں ہوتا ہے

یعنی تو ہو نہ یہاں پھر بھی یہاں ہوتا ہے

ذکرِ حق زینتِ لب، وردِ زباں ہوتا ہے

سر کوئی گرچہ سرِ نوک سناں ہوتا ہے

آنکھ لگتی ہے کوئی اور جہاں ہوتا ہے 

اور کھلتی ہے تو کچھ اور سماں ہوتا ہے

جو بھی ہوتا ہے رہِ عشق میں سو بسم اللہ

سُود ہوتا ہے مجھے اب کہ زیاں ہوتا ہے 

جب وہ بے درد مِرے درد کی بابت پوچھے 

میں بھی کہہ دیتا ہوں ہاں ہوتا ہے، ہاں ہوتا ہے

ایک دنیا مِری آنکھوں میں تجھے دیکھتی ہے 

حالِ دلِ یار! فقط تجھ سے نہاں ہوتا ہے

آئینہ دیکھوں تو اک عکس مجھے پوچھتا ہے 

تجھ میں ساجد کوئی رہتا تھا، کہاں ہوتا ہے

نعیم عباس ساجد