سر مقتل ادھر وہ کھینچ کر تیغ جفا نکلے

سر مقتل اُدھر وہ کھینچ کر تیغِ جفا نِکلے

اِدھر سر اپنے ہاتھوں پر لیے اہلِ وفا نکلے

لگا اک ہاتھ ایسا خنجرِ بے داد کا اپنے

مِری حسرت بھی اے قاتل! تِرا بھی مُدّعا نکلے

مِری جاں بازیوں کا امتحاں ہو جائے مقتل میں

کِھنچے تیغِ ستم اُن کی، تو دل کا حوصلہ نکلے

رہِ اُلفت میں ہے آہِ دلِ مُضطر سہارے کو

یہ زور ناتوانی ہے کہ لے کر ہم عصا نکلے

بھری محفل میں ظالم کو ہُوئی شرمندگی حاصل

لہو میں تر جو دِیوانے صفِ محشر میں آ نکلے

کھڑے ہیں اس لیے خاموش پیشِ داورِ محشر

نہ جانے کیا کہیں ہم اور اپنے منہ سے کیا نکلے

تحمّل کے سبب رونق ہوئی اس بزم کی شعلہ

وہی اس ڈُوبتی کشتی کے گویا نا خدا نکلے

شعلہ کراروی

سید مومن حسین