مرے آنگن کی مٹی کی سماعت بھی

 مِرے آنگن کی مٹی کی سماعت بھی

تمہاری ایک آہٹ کے لیے کب سے ترستی ہے

دریچوں کی کھُلی آنکھوں سے

اک حسرت ٹپکتی ہے

محبت کا کوئی نغمہ ہوا جب گُنگناتی ہے

تمہاری یاد کی خُوشبو فضا میں پھیل جاتی ہے

ادھورا چاند ہجراں کا

مِری بے خواب آنکھوں کے تعاقب میں

تمہاری راہ تکتا ہے

گلوں کی نرمیوں کو اوس چھُونے کو اترتی ہے

مِری آنکھوں کی شبنم سے تمہاری بات کرتی ہے

کبھی جب رات بستر پر مِرے تھک کر جو آتی ہے

مِرے تکیے کے نم سے اس کی آنکھیں بھیگ جاتی ہیں

وہ میری ہمنوا بن کر

تمہیں آواز دیتی ہیں

تمہیں واپس بلاتی ہیں

درِ آید میں نے شہرِ دل کا کھول رکھا ہے

کہ تم کو لوٹ آنا ہے

ذرا موہوم سی آہٹ پہ بھی دل چونک اٹھتا ہے

کہ جیسے تم چلے آئے

مجھے محسوس ہوتا ہے

کہ برگ و گل سے لے کر آسمانوں تک کا ہر ذرہ

تمہاری راہ تکتا ہے

مگر میں نے سنا یہ ہے

بچھڑ جاتے ہیں جو اک بار وہ پھر مل نہیں پاتے

سنو! اک بار آ جاؤ

زمانے کو بتا جاؤ

کہ دنیا جو بھی کہتی ہے ہمیشہ

سچ نہیں ہوتا

شاہدہ مجید