جو زیرِ آب تھے ان کو چناب دینا پڑا
برائے تشنہ لبی پھر سراب دینا پڑا
بہت سے لوگ محبت کے مقتضی تھے یہاں
پر اس کو دیکھ کے سب کو جواب دینا پڑا
عجب طرح کی جسارت کا سامنا تھا مجھے
جو خود گُلاب تھا اس کو گُلاب دینا پڑا
دکھائی دی ہے کٹہروں میں شعبدہ بازی
امیرِ شہر کو جب بھی حساب دینا پڑا
کچھ اس لیے بھی کہ ٹُوٹے نہ رتجگوں کا بھرم
کسی کی جاگتی آنکھوں کو خواب دینا پڑا
بہ شکلِ آبلہ پائی بہ طرزِ گردِ قبا
برائے مکتبِ صحرا نصاب دینا پڑا
ہمیں کچھ اپنی سخاوت کی آبرو تھی عزیز
سوال کرتی تپش کو سحاب دینا پڑا
جو اس کے نام غزل تھی وہ پیش کی عباس
بیاضِ شعر سے جب انتخاب دینا پڑا
حیدر عباس
No comments:
Post a Comment