مجھے ضرورت نہیں ہے کہ میں حساب رکھوں

 یہ ساری باتیں تو اس کے جانے کے بعد کی ہیں

نظر سے اوجھل ضرور ہے پر جُڑا ہوا ہے

پتنگ بن کر وہ آسمانوں پہ تیرتا ہے

میں ڈور لے کر زمین پر ہوں

یہ جانتا ہوں

کہ پیچ لگنے تلک کا ہی ساتھ ہو گا بس یہ

وہ جب کٹے گا تو سرحدوں سے پَرے گِرے گا

مگر یہ کم ہے؟

اسے ان آنکھوں میں بھر کے رکھنا تو ٹھیک ہے پر

ہر ایک لمحے کو گِن کے کاغذ پہ درج کرنے سے کیا ملے گا؟

ہے کیا ضمانت؟

کہ وصل کی ہر گھڑی کو دل میں سنبھال رکھنا

اسے کبھی گم نہیں کرے گا

وہ ساتھ ہوتا ہے بس بہت ہے

مجھے ضرورت نہیں ہے کہ میں حساب رکھوں

وہ کب گیا، کتنی دیر ٹھہرا

جو ملنے آیا تو کیا سمے تھا

یہ گوشوارے ہیں ہجرتوں کے

کہ جب پرندوں کے کوچ کرنے کا وقت ہو گا، ضرور بھرنا

فراق لمحوں کا شوق سمجھو

یا آنے والی رُتوں میں فرصت کا شغل جانو

یہ سارے تخمینے ہِجر کے ہیں

تمام فکریں تو یاد کی ہیں

یہ ساری باتیں تو اس کے جانے کے بعد کی ہیں

ہمایوں منصور